Қ. И. Сәтбаев атындағы ҚазҰТУ 90 жылдығын атап өтті

   Қазақстан Республикасындағы ең көне жоғары оқу орындарының бірі – «Қ. И. Сәтбаев атындағы Қазақ ұлттық техникалық зерттеу университетінің» 90 жылдығы және академик-ғалым Қаныш Сәтбаевтің туғанына 125 жыл толуына орай «Еуразияның ғылыми-инженерлік қоғамдастығы алдындағы төртінші өнеркәсіптік сын-қатерлері» атты халықаралық ғылыми форум өтті.
    Форум аясында университет аумағында орналасқан ұлы ғалымның ескерткішіне гүл шоқтары қойылып, Қаныш Имантайұлының Қазақстан ғылымы мен өнеркәсібіне қосқан орасан зор үлесі құрметпен еске алынды. Салтанатты іс-шараға «Ауыл шаруашылығы аэрофотогеодезиялық іздестіру мемлекеттік институты (АШАІМИ)» республикалық мемлекеттік кәсіпорны директоры Нұрбол Салыбеков қатысты.
    Қазақстанның жетекші жоғары оқу орындары мен ірі кәсіпорын мамандары, белгілі ғалымдар, мемлекеттік және білім беру мекемелерінің өкілдері қатысқан бұл форумда арнайы инженерлік орталықтар мен ғылыми-технологиялық парктер құру, мемлекет пен ғылым тарапынан экономиканы модернизациялау, технологиялық прогресті іске асырудағы басты бағыттар мен  инженерлік ғылымдағы жаңа технологиялар бойынша ғылыми-зерттеу хабын құру мәселесі қарастырылды. Бұл орталықтар инженерлік шешімдерден туған жаңа технологиялар мен инновациялық жобаларды дамытуға бағытталған.
    Форум барысында, ақпараттық технологиялар мен баламалы энергия көздері, мұнай-газ, тау-металлургия өнеркәсібі секілді Қазақстанның негізгі салалары бойынша кадр даярлау мәселелері де талқыланып,  әртүрлі салалардағы модернизация мен дамуға ықпал ететін жаңа технологиялардың таныстырылымы өтті.